O‘zbekistonda 2029-yil oxirigacha raqamli so‘m tizimi to‘liq amaliyotga joriy etiladi
Yangi milliy valyuta shakli oddiy fuqarolarning kundalik mayda hisob-kitoblari uchun emas, balki tijorat banklari va to‘lov tashkilotlari o‘rtasidagi yirik moliyaviy operatsiyalarni amalga oshirishga mo‘ljallanadi. Tasdiqlangan konsepsiyaga muvofiq, Regulyator 2027-yil yakuniga qadar raqamli so‘mning iqtisodiy samaradorligi hamda ehtiyojini atroflicha o‘rganadi. Shundan so‘ng, 2028-yilda loyihaning dastlabki pilot sinovlari o‘tkazilib, natijalar ijobiy baholansa, 2029-yil oxirigacha tizim to‘liq ishga tushirilishi va moliya institutlari unga bosqichma-bosqich ulanishi ko‘zda tutilgan.
Raqamli valyutaning asosiy afzalliklaridan biri davlat budjeti mablag‘lari va maqsadli subsidiyalar sarflanishini qat’iy nazorat qilish imkoniyatidir. Chunonchi, loyiha davlat xaridlari hamda yirik infratuzilma obyektlarini moliyalashtirishda qo‘llanilib, pudratchilarga pullar faqat ish bosqichma-bosqich bajarilib, tasdiqlanganidan keyingina o‘tkazib beriladi. Bu esa davlat investitsiyalarining maqsadli va shaffof sarflanishini real vaqt rejimida kuzatish hamda korrupsion xatarlarni keskin kamaytirish imkonini yaratadi.
Bundan tashqari, Markaziy bank vakillari ushbu tizim banklararo hisob-kitoblardagi tavakkalchiliklarni pasaytirishi va sutka davomida uzluksiz avtomatik likvidlikni ta’minlashini ta’kidlamoqda. Bugungi kunda dunyo bo‘ylab 143 ta markaziy bank raqamli valyutalarni joriy etish ustida ish olib borayotgan bo‘lsa-da, loyihani yakuniy amaliyotga tatbiq etish va rasmiy qaror qabul qilish xalqaro ekspertlar xulosasi hamda o‘tkaziladigan sinovlar natijalariga ko‘ra amalga oshiriladi.
