O‘zbekistonda 2027-yil iyuldan energiya tariflarini hisoblashda yangi tizim yo‘lga qo‘yiladi
2027-yil 1-iyuldan yoqilg‘i-energetika sohasida tariflarni hisoblash uchun yagona raqamli platforma joriy etiladi. Bu «Yoqilg‘i-energetika tarmog‘ini yanada rivojlantirish chora-tadbirlari to‘g‘risida»gi Prezident farmonida (PF–202-son, 2026-yil 22-sentabr) belgilangan.
Platforma Vazirlar Mahkamasi huzuridagi Yoqilg‘i-energetika sohasida idoralararo tarif komissiyasi faoliyatida qo‘llanadi. U orqali faoliyati tartibga solinadigan korxonalarning tarif bo‘yicha buyurtmalari, shuningdek, tariflarni hisoblash uchun zarur moliyaviy, texnik va boshqa ma’lumotlar elektron shaklda qabul qilinib, qayta ishlanadi. Hisob-kitoblar Vazirlar Mahkamasi tasdiqlagan tartib asosida avtomatlashtiriladi.
Farmonga ko‘ra, Energetika vazirligining yoqilg‘i-energetika tarmog‘i korxonalari va iste’molchilariga shartnomaviy, xizmat ko‘rsatish hamda boshqa xo‘jalik munosabatlari bo‘yicha individual ruxsatnomalar berish amaliyoti bekor qilinadi.
Energetika bozorini rivojlantirish va tartibga solish agentligiga elektr energiyasi bilan bir qatorda tabiiy va suyultirilgan gaz ta’minotida bozor tamoyillarini bosqichma-bosqich shakllantirish hamda sohani tartibga solish vazifasi yuklatiladi.
Elektr energiyasi, neft mahsulotlari va gazdan foydalanishni nazorat qilish inspeksiyasi esa qoidabuzarliklarning oldini olish, profilaktika qilish va xavflarni erta aniqlashga qaratilgan preventiv nazorat modeliga o‘tadi.
Yoqilg‘i-energetika tarmog‘i korxonalari o‘z yo‘nalishi bo‘yicha resurslarni qazib olish, ishlab chiqarish, qayta ishlash, tashish, saqlash, uzatish, taqsimlash, yetkazib berish va sotish kabi xo‘jalik faoliyatini amalga oshiradi.
