O‘zbekiston Rustam Inoyatov fuqaroligini olgani aytilgan mamlakat bilan diplomatik aloqa o‘rnatdi
Hujjatni ikki davlat hukumatlari nomidan O‘zbekistonning BMTdagi doimiy vakili Ulug‘bek Lapasov va Vanuatuning BMT huzuridagi missiyasi rahbari Odo Tevi imzoladi. Rasmiy marosim doirasida o‘tkazilgan muloqot chog‘ida tomonlar BMT va uning ixtisoslashtirilgan muassasalari doirasida o‘zaro hamkorlikni rivojlantirish hamda ko‘p tomonlama aloqalarni yanada mustahkamlash masalalarini muhokama qilgan.
Ushbu kelishuv O‘zbekistonning Tinch okeani mintaqasidagi mamlakatlar bilan diplomatik hamkorlik ko‘lamini kengaytirishga qaratilgan amaliy qadamlaridan biri bo‘ldi. Rasmiy Toshkent so‘nggi yillarda dunyoning turli mintaqalaridagi davlatlar bilan to‘g‘ridan-to‘g‘ri aloqalarni yo‘lga qo‘yish siyosatini faol davom ettirmoqda.
Ma’lumot uchun, O‘zbekiston joriy yilning aprel oyida ham Nyu-Yorkdagi vakolatxonada Gvineya-Bisau davlati bilan diplomatik munosabatlarni o‘rnatish bo‘yicha xuddi shunday kommyunikeni imzolagan. Shu tariqa O‘zbekistonning jahon hamjamiyatidagi diplomatik sheriklari soni yana birga ko‘paydi.
Eslatib o‘tamiz, O‘zbekiston Milliy xavfsizlik xizmati (hozirgi DXX) sobiq rahbari, general-polkovnik Rustam Inoyatov va uning oila a’zolari Tinch okeanida joylashgan Vanuatu Respublikasining “oltin pasporti”ni (investitsiya evaziga fuqarolik) olgani haqida xalqaro surishtiruvchi jurnalistlar va OAV ma’lumot bergan edi.
