O‘zbekiston, Ozarbayjon va Turkiya armiyasi Qorabog‘da harbiy mashg‘ulotlarini boshladi
“Birlik kuchi – 2026” deb nomlangan ushbu mashg‘ulotlardan ko‘zlangan asosiy maqsad harbiy xizmatchilarning qo‘shma tezkor operatsiyalarni o‘tkazish bo‘yicha tayyorgarlik darajasini oshirishdan iborat. Shuningdek, mashqlar doirasida turli mamlakat bo‘linmalari o‘rtasidagi amaliy hamkorlikni kuchaytirish, jangovar shaylikni oshirish va o‘quv-taktik jarayonlarni o‘zaro muvofiqlashtirish ko‘zda tutilgan.
Qo‘shma tayyorgarlikning muhim yo‘nalishlaridan biri zamonaviy harbiy harakatlar bo‘yicha o‘zaro tajriba almashish hisoblanadi. Uch do‘stona davlat harbiylari o‘quv mashg‘ulotlari davomida eng so‘nggi taktik usullar va yondashuvlarni o‘zlashtirib, bo‘linmalarning o‘zaro uyg‘unlikda harakat qilish ko‘nikmalarini sinovdan o‘tkazgan.
Mas’ul rahbarlarning ta’kidlashicha, ushbu taktik mashg‘ulotlar qo‘yilgan murakkab vazifalarni birgalikda va operativ hal etish imkonini beradi. Shu bilan birga, bunday harakatlar O‘zbekiston, Ozarbayjon va Turkiya qurolli kuchlari o‘rtasidagi ko‘p tomonlama harbiy hamkorlik hamda munosabatlarni yangi bosqichga olib chiqishga xizmat qiladi.
