O‘zbekiston OTMlarida 40 yoshdan oshgan talabalar soni oxirgi 15 yilda qariyb 87 barobarga ko‘paydi
Ushbu ko‘rsatkich 2010/2011-o‘quv yilidagi natijalar bilan solishtirilganda mutlaq rekord o‘sishni ko‘rsatadi. O‘sha davrda oliy ta’lim tizimida ushbu yosh toifasiga mansub atigi 616 nafar talaba ta’lim olgan bo‘lib, o‘tgan yillar davomida ularning safi 52 867 nafarga kengaydi.
Raqamlar dinamikasi so‘nggi yillarda katta yoshli fuqarolarning oliy ma’lumot olishga bo‘lgan qiziqishi keskin ortganini tasdiqlaydi. Masalan, 2015-yildan 2017-yilgacha bo‘lgan oraliqda bu ko‘rsatkich 170-174 nafar atrofida deyarli o‘zgarmay turgan bo‘lsa, 2018/2019-o‘quv yilida sakrash kuzatilib, 7 ming nafardan oshdi.
Keyingi bosqichda ko‘rsatkichlar barqaror o‘sib bordi: 2020/2021-o‘quv yilida 10,1 ming, 2022/2023-o‘quv yilida 20,2 ming va 2024/2025-o‘quv yiliga kelib 44 ming nafardan ortiq fuqaro OTMlarda tahsil oldi. Bu ko‘rsatkich uzluksiz ta’lim va malaka oshirish tizimidagi o‘zgarishlarning amaldagi samarasini ko‘rsatadi.
