Noyabrdan tadbirkorlar uchun svet va gaz to‘lovi 15 foizga tushiriladi
Prezidentning 27-avgustdagi PF–175-sonli Farmoniga asosan kichik biznes subyektlari faoliyatini tekshirishga uch yil muddatga moratoriy joriy etildi. Ushbu cheklov davrida belgilangan istisnolardan tashqari har qanday tekshiruvlar noqonuniy hisoblanadi va qoidabuzarlikka yo‘l qo‘ygan mansabdorlar javobgarlikka tortiladi.
Jinoyat ishlari, inson salomatligi, mehnat huquqlari, fuqarolar murojaatlari, QQSni qaytarish hamda korxonani tugatish jarayonlari bilan bog‘liq holatlar moratoriy kirmaydigan istisnolar sirasiga kiradi. Bir vaqtning o‘zida Biznes-ombudsman nazorat organlarining so‘nggi uch yildagi tekshiruvlarini joyiga chiqib o‘rganadi va noqonuniy holatlar aniqlanganda tadbirkorlar huquqlarini tiklash choralarini ko‘radi.
Shuningdek, 2026-yil 1-noyabrdan e’tiboran EHNAT va TGNHAT avtomatlashtirilgan tizimlariga ulangan, masofadan o‘chirish xususiyatiga ega hisoblagichi bor tadbirkorlar uchun energiya resurslari bo‘yicha oylik avans to‘lovi miqdori 15 foiz etib belgilanadi. Ushbu imtiyoz oxirgi ikki oyda to‘lov intizomini buzmagan iste’molchilarga nisbatan tatbiq etiladi.
Yangi tartibga ko‘ra, mazkur tadbirkorlarning hududiy ta’minot korxonalariga elektr va gaz sarfi bo‘yicha yozma hisobot topshirish majburiyati bekor qilinadi. Bundan tashqari, kommunal xizmat ko‘rsatish shartnomalari to‘liq elektron shaklga o‘tkazilib, ularni pochta orqali qog‘ozda yuborish amaliyotiga chek qo‘yiladi.
