Mikromoliya bozorining 99 foizi 82 ta tashkilot hissasiga to‘g‘ri kelmoqda
O‘zbekiston mikromoliya bozorida tashkilotlar soni jihatidan tarkib nisbatan keng bo‘lsada, moliyaviy faoliyat hajmi hamda resurslarning asosiy qismi yirik subyektlar hissasiga to‘g‘ri kelmoqda.
Markaziy bank ma’lumotlariga ko‘ra, 2026-yil 1-sentyabr holatiga ko‘ra, respublikada 141 ta mikromoliya tashkiloti faoliyat yuritayotgan bo‘lib, ularning jami aktivlari 20,8 trillion so‘mni tashkil etdi. Biroq sohadagi moliyaviy oqimlarning asosiy qismi aktivlari 10 milliard so‘m va undan yuqori bo‘lgan 82 ta tashkilot qo‘lida jamlangan. Ushbu guruh hissasiga 20,5 trillion so‘m yoki jami aktivlarning qariyb 99 foizi to‘g‘ri kelmoqda.
Kreditlash va kapital ko‘rsatkichlarida ham xuddi shunday jamlanish darajasi kuzatiladi. Yirik tashkilotlarning sof kreditlari 17,9 trillion so‘mni tashkil etib, mikromoliya tashkilotlari jami kredit portfelining asosiy qismini shakllantirgan. Sektorning jami 4,4 trillion so‘mlik kapitalidan 4,3 trillion so‘mi va ustav kapitalining 2 trillion so‘mdan ortiq qismi ham aynan ushbu 82 ta tashkilot hisobiga to‘g‘ri keladi.
Majburiyatlarning taqsimlanishida esa jamlanish darajasi yanada yuqori ko‘rsatkichni namoyon etmoqda. Jami 16,3 trillion so‘mlik majburiyatning 16,27 trillion so‘mi yirik MTIlar ulushiga to‘g‘ri keladi. Shuningdek, ular tomonidan jalb qilingan kreditlar, qarzlar va lizing hajmi 13 trillion so‘mdan oshgan. Ushbu ma’lumotlar mikromoliya bozori ko‘lamining o‘sishi bilan birga, uning tarkibiy tuzilishi asosan yirik ishtirokchilar atrofida shakllanayotganidan dalolat beradi.
