Markaziy Osiyoning besh davlatida gaz tarmoqlari birlashishi mumkin
Toshkentda o‘tgan neft-gaz forumida muhokama qilingan “Markaziy Osiyo gaz halqasi” deb nomlangan ushbu yirik loyiha qiymati dastlabki hisob-kitoblarga ko‘ra 5 milliard dollarni tashkil etadi.
Tashabbus amaldagi gaz quvurlarini modernizatsiya qilish hamda yetishmayotgan hududlarda yangi tarmoqlarni qurishni nazarda tutadi. Loyiha doirasida umumiy uzunligi 3 ming kilometrdan oshadigan va yillik 20 milliard kub metr gaz o‘tkazish quvvatiga ega tarmoq barpo etilishi ko‘zda tutilgan. Bu orqali qishki va yozgi mavsumiy ehtiyojga qarab gazni mintaqa davlatlari o‘rtasida tezkor qayta taqsimlash va quvurlardan ikki tomonlama foydalanish imkoni yaratiladi.
Ushbu yagona halqa g‘oyasi O‘zbekistonda gaz qazib olish hajmi qisqarayotgan bir paytda ilgari surilmoqda. Rasmiy statistikaga ko‘ra, 2026-yilning yanvar–avgust oylarida mamlakatda tabiiy gaz ishlab chiqarish o‘tgan yilning mos davriga nisbatan 16,3 foizga kamaygan. Shunga qaramay, qo‘shni davlatlarga gaz yetkazib berish shartnomalari davom etmoqda.
Global Gas Centre xalqaro tashkiloti vakillarining bildirishicha, “O‘zbekneftgaz” hamda ehtimoliy xorijiy investorlar ushbu tashabbusga qiziqish bildirgan. Biroq hozircha mintaqa davlatlari o‘rtasida rasmiy hukumatlararo bitim imzolanmagan, loyihani moliyalashtirish manbalari hamda qurilish muddatlari uzil-kesil tasdiqlanmagan.
