Maktablarda Finlyandiya va Singapur tajribasi asosida 1,3 mingdan ortiq nomdagi yangi darsliklar tayyorlanadi
O‘quv dasturlarini mazmunan yangilash doirasida 2027-yilgacha 1 342 nomdagi darslik va metodik qo‘llanmalar ishlab chiqiladi. Boshlang‘ich sinf kitoblari Finlyandiya ta’lim alyansi sertifikatidan o‘tkazilgan bo‘lsa, aniq va tabiiy fanlar bo‘yicha 5–7-sinf darsliklari Singapur tajribasi asosida tayyorlandi. Yangi tizimda o‘quvchilarning tanqidiy fikrlashi, ijodkorligi hamda moliyaviy va raqamli savodxonligini oshirishga asosiy e’tibor qaratilmoqda. Ushbu metodika bo‘yicha allaqachon 100 mingdan ziyod pedagoglar malakasi oshirildi.
Oliy ta’lim yo‘nalishida esa yuqori bosqich talabalarining kamida 80 foizini, ya’ni 185 ming nafar yoshni dual ta’lim bilan qamrab olish maqsadi belgilandi. Bunda muhandislik, qurilish va qishloq xo‘jaligi sohalariga ustuvorlik berilib, talabalarni amaliyotga qabul qilgan korxonalarga qator imtiyozlar, jumladan ish haqining 50 foizini subsidiya qilish hamda davlat xaridlarida afzalliklar berish taklif etilmoqda.
Shuningdek, Xiva shahrida faoliyat boshlagan Lyaonin pedagogika universiteti filialida xalqaro biznes, turizm va sun’iy intellekt yo‘nalishlarida kadrlar tayyorlash, mahalliy oliygohlar bilan talabalar almashinuvini yo‘lga qo‘yish masalalari ko‘rib chiqildi. Davlat rahbari ta’lim sifatini hududlardagi real kadrlar ehtiyojiga uzviy bog‘lash bo‘yicha mas’ullarga ko‘rsatmalar berdi.
