Ixtiyoriy pensiya jamg‘argan fuqarolarga davlat ham o‘z hisobidan pul qo‘shib berishi kutilmoqda
Yangi taklifga ko‘ra, oylik maoshi 7,6 million so‘mgacha bo‘lgan fuqaro o‘z daromadining 5 foizini ixtiyoriy ravishda jamg‘arsa, davlat uning daromad darajasidan kelib chiqqan holda ushbu badalning 50 foizigacha bo‘lgan qismini o‘z hisobidan qo‘shib beradi. Shuningdek, 7,6 million so‘mdan yuqori maosh oluvchilar to‘laydigan ijtimoiy soliqning 1 foizini avtomatik ravishda fuqaroning shaxsiy pensiya hisobvarag‘iga o‘tkazish va ushbu ulushni 2040-yilgacha bosqichma-bosqich 3 foizga yetkazish ko‘zda tutilgan.
Oylik ish haqi 2,8 million so‘m bo‘lgan fuqaro misolida ko‘rilganda, u har oy maoshining 5 foizini (140 ming so‘m) jamg‘arsa, davlat yana 42 ming so‘m qo‘shadi. Natijada fuqaro 25 yil davomida foiz daromadlari bilan birga 93,5 million so‘m to‘plashi hamda kafolatlangan 1,5 million so‘mlik pensiyasiga har oy qariyb 445 ming so‘m qo‘shimcha olishi mumkin bo‘ladi.
Ushbu amaliyot natijasida fuqaroning oylik pensiya daromadi 2 million so‘mga yetishi kutilmoqda. Ta’kidlash joizki, ushbu yangi tartib va hisob-kitoblar hozircha loyiha hamda taklif ko‘rinishida bo‘lib, rasman kuchga kirgani yo‘q.
