Ish joyidagi baxtsiz hodisalarda oqibat o‘lim yoki og‘ir jarohat bo‘lsa, majburiy maxsus tekshiruv o‘tkaziladi
Yangi nizomga muvofiq, ish joyida biror ko‘ngilsizlik yuz berganda ish beruvchi zudlik bilan jabrlanuvchiga birinchi tibbiy yordam ko‘rsatilishini ta’minlashi, shuningdek, uni kechiktirmay shifoxonaga yetkazishi shart. Shu bilan birga, hodisa haqida vakolatli organlar, kasaba uyushmasi va xodimning yaqin qarindoshlari zudlik bilan xabardor qilinishi lozim.
Maxsus komissiya voqea joyiga yetib kelgunga qadar sex yoki bo‘linma rahbari ish joyi, uskunalar va atrofdagi vaziyatni xuddi hodisa sodir bo‘lgan paytdagidek, o‘zgartirmagan holda saqlab qolishi shart qilib belgilandi. Jabrlangan xodim yoki hodisa guvohlari esa sodir bo‘lgan ko‘ngilsizlik haqida rahbarlarga darhol xabar berishlari kerak.
Tasdiqlangan tartibga ko‘ra, bir vaqtning o‘zida ikki va undan ortiq kishi jarohatlangan guruhli holatlar, oqibati o‘rtacha og‘ir, og‘ir bo‘lgan hamda o‘lim bilan tugagan baxtsiz hodisalar alohida maxsus tekshiruvdan o‘tkaziladi. Biroq xodimning o‘zini o‘zi o‘ldirishi, tabiiy o‘lim, o‘z salomatligiga qasddan zarar yetkazishi yoki jinoyat ustida olingan jarohatlar ushbu tartibda tekshirilmaydi va hisobga olinmaydi.
- #baxtsiz hodisa
- #o‘lim
- #maxsus tekshiruv
