Andijonda 271 milliard so‘mlik yo‘lo‘tkazgich va yangi turizm obyektlari foydalanishga topshirildi.
Prezident Shavkat Mirziyoyev Andijon viloyatiga tashrifi doirasida infratuzilmani yaxshilash, paxtachilikda innovatsion texnologiyalarni joriy etish va turizm imkoniyatlarini kengaytirishga qaratilgan bir qator yirik loyihalar bilan tanishdi.
Andijon shahrida umumiy qiymati 271 milliard so‘mga teng bo‘lgan 796 metrlik yangi yo‘lo‘tkazgich ko‘zdan kechirildi. Boburshoh ko‘chasini bog‘lovchi ushbu inshoot shahar va Oltinko‘l tumanining 140 ming aholisi uchun ortiqcha masofani 5,3 kilometrga, manzilga yetib borish vaqtini esa 17 daqiqagacha qisqartiradi. Eng muhimi, tez tibbiy yordam va maxsus xizmat avtomobillari bemorlarni shoshilinch markazga ilgariroq yetkazish imkoniga ega bo‘ldi.
Shuningdek, “Agroklaster Oltinko‘l” korxonasida Shinjon texnologiyasi asosida paxta yetishtirish tajribasi ko‘rsatildi. Chigitni plyonka ostiga ekish va tomchilatib sug‘orish orqali suv sarfi 40 foizga, o‘g‘it esa 30 foizga tejalib, hosildorlik gektariga 60–70 sentnerga yetkazilmoqda. Asaka tumanida esa 51,8 milliard so‘mlik ekoturizm majmuasi va uzumzorlar tashkil etilib, qariyb 500 ta yangi ish o‘rni yaratildi hamda hududda agrodronlar va membranali suv havzalaridan foydalanish yo‘lga qo‘yilgan.
Tashrif yakunida davlat rahbari Andijon shahridagi O‘rikzor mahallasida joylashgan 24/7 rejimida ishlaydigan yangi gastronomik turizm ko‘chasini ko‘zdan kechirgan. 18 milliard so‘m evaziga barpo etilgan 1,2 kilometrlik ushbu hududda piyodalar va velosiped yo‘laklari, selfi zonalari hamda 35 ta savdo va xizmat ko‘rsatish shoxobchasi tashkil etilgan bo‘lib, u kuniga 10 mingdan ortiq aholi va sayyohlarga xizmat ko‘rsatish quvvatiga ega.
