Andijon kelasi yili 5 milliard dollar investitsiya jalb qilib, eksportni 1,5 milliard dollarga yetkazadi
Yig‘ilishda sanoat va tadbirkorlik uchun ajratilgan 1 ming gektar maydonda 7 milliard dollarlik sarmoyaviy loyihalarni joylashtirish hamda 70 mingta yuqori daromadli ish o‘rni yaratish topshirildi.
Shu bilan birga, Asaka shahrida avtomobilsozlik va mashinasozlik yo‘nalishidagi 30 yillik tajribaga tayanib, elektronika, elektromexanika va dasturiy mahsulotlar ishlab chiqarishni qamrab oluvchi “Asaka muhandislik vodiysi” tashkil etilishi ma’lum qilindi. Endilikda har bir loyiha samaradorligi ajratilgan yerning har bir kvadrat metridan olinadigan qo‘shilgan qiymat mezoniga qarab baholanadi.
Viloyatda oziq-ovqat zaxirasini boyitish va qishloq xo‘jaligini modernizatsiya qilish bo‘yicha ham yangi komplekslar barpo etiladi. Ulug‘norda paxtadan bo‘shagan 5 ming gektar yerda 10 ming bosh qoramol boqishga mo‘ljallangan majmualar va 1,2 ming gektarda baliqchilik klasteri tashkil etiladi.
Jalaquduq hamda Xo‘jaobod tumanlarida esa Baliqchi tajribasi asosida yangi parrandachilik majmualari ishga tushirilishi rejalashtirilgan.
Adir yerlarini aylanmaga kiritish va meva-sabzavotchilikni rivojlantirish uchun alohida “Agrostar” kompaniyasi tuzilib, bahorgacha 4-5 ming gektar maydonga suv chiqariladi va tayyor sanoatlashgan bog‘lar barpo etiladi. Ushbu maqsadlar uchun 30 million dollar hamda suv chiqarish ishlariga 200 milliard so‘m ajratiladi.
Mahsulotlarni qayta ishlash darajasini 30 foizga, eksportni esa 500 million dollarga yetkazish uchun kichik uskunalarni aholiga lizingga berishga 100 milliard so‘m yo‘naltiriladi.
