“Adolat” SDP Milliy kutubxona ortidagi yashil hudud o‘rniga parkovka qurilishiga qarshi chiqdi
Ijtimoiy tarmoqlarda Alisher Navoiy nomidagi O‘zbekiston Milliy kutubxonasi ortidagi yer maydonida davlat-xususiy sheriklik shartlari asosida parkovka barpo etilishi rejalashtirilgani haqida ma’lumotlar tarqaldi. Hozircha ushbu loyihaning aniq chegaralari, yerning huquqiy maqomi va mavjud yashil hududning qancha qismi saqlab qolinishi bo‘yicha rasmiy hamda ochiq ma’lumotlar jamoatchilikka taqdim etilganicha yo‘q.
Partiya matbuot xizmati vakillarining ta’kidlashicha, amaldagi qonunchilikda parklar, xiyobonlar va ulardagi daraxtlarni muhofaza qilish bo‘yicha qat’iy kafolatlar belgilangan. Davlat mulki bo‘lgan va aholining dam olishiga mo‘ljallangan yerlarni xususiylashtirish yoki ularning hududini qisqartirib, so‘ngra “obodonlashtirish” niqobi ostida taqdim etish g‘oyasi partiyaning saylovoldi dasturiga hamda jamoat manfaatlariga mutlaqo zid hisoblanadi.
Shu munosabat bilan “Adolat” SDP mas’ul idoralarni ushbu loyiha bo‘yicha to‘liq va ochiq hisobot berishga chaqirdi. Partiya vakillari transport infratuzilmasini yaxshilash zarurligini tan olgan holda, har qanday qurilish ishlari ekologik barqarorlik va mavjud daraxtlarni saqlab qolish tamoyillariga muvofiq ravishda amalga oshirilishi shartligini bildirishdi.
Avvalroq Toshkent shahar hokimining ushbu qaroriga bir qator ijodkorlar ham norozilik bildirib chiqqan edi.
- #Milliy kutubxona
- #yashil hudud
- #“Adolat” SDP
