51 yoshli Oksana Chusovitina Osiyo o‘yinlari finaliga chiqdi
Chusovitina saralash bahslarida ikki sakrashi natijasiga ko‘ra 13,266 ball to‘plab, to‘rtinchi o‘rinni egalladi. U birinchi sakrashi uchun 13,366, ikkinchisi uchun esa 12,766 ball oldi. Final bugun, 24-sentabr kuni bo‘lib o‘tadi.
Musobaqadan keyin gimnastikachi Olimpiadaga yana bir bor yo‘llanma olishga urinib ko‘rishini bildirdi.
“2028-yilgi Olimpiadaga saralashdan o‘tishga harakat qilaman. Bu sport, bu gimnastika. Agar imkon bo‘lsa, Los-Anjelesda qatnashishga urinaman”, — dedi u jurnalistlarga.
Chusovitina ilk sakrashidan so‘ng saralashda vaqtincha peshqadamlik qildi. Murakkablik darajasi 4,4 ball bo‘lgan ushbu mashqning ijrosi 8,966 ballga baholandi. Ikkinchi sakrashida esa murakkablik uchun 4,0, ijro uchun 8,766 ball oldi.
Sportchi Osiyo o‘yinlarida yettinchi bor ishtirok etmoqda. U bu musobaqada ilk marta 1994-yilda qatnashgan. 2002-yilgi Osiyo o‘yinlarida tayanib sakrash va erkin mashqlar bo‘yicha oltin medallarni qo‘lga kiritgan, 2018-yilda esa 43 yoshida tayanib sakrash bo‘yicha kumush medal olgan.
Chusovitinaning Olimpiya o‘yinlaridagi ilk ishtiroki 1992-yilgi Barselona Olimpiadasiga to‘g‘ri kelgan. O‘shanda u jamoaviy bahslarda oltin medalni qo‘lga kiritgan. 2008-yilgi Pekin Olimpiadasida esa tayanib sakrash bo‘yicha kumush medalga sazovor bo‘lgan. Los-Anjeles o‘yinlariga yo‘llanma olsa, bu uning to‘qqizinchi Olimpiadasi bo‘ladi.
Gimnastikachi uzoq yillik faoliyati davomida jiddiy jarohat olmaganini aytdi. Hozir esa musobaqalarning o‘zidan ko‘proq zavq olayotganini ta’kidladi.
«Zavqlanayotgan va mashqlarni bajara olayotgan ekanman, nega to‘xtashim kerak? Men hech kim bilan bellashayotganim yo‘q. Shunchaki jarayondan zavqlanyapman», — dedi Chusovitina.
Saralashda Janubiy Koreya vakili Yo So Jong 14,466 ball bilan birinchi o‘rinni egalladi. Shimoliy koreyalik An Chang Ok 13,900 ball bilan ikkinchi, xitoylik Du Siyu 13,433 ball bilan uchinchi bo‘ldi.
