“Yil o‘qituvchisi” tanlovining 208 nafar g‘olibi aniqlandi
O‘zbekistonda ilk bor o‘tkazilgan “Yil o‘qituvchisi” tanlovi g‘oliblari aniqlandi. 208 ta tuman va shahar bo‘yicha birinchi o‘rinni egallagan pedagoglarning har biri 616 mln so‘mdan pul mukofoti bilan taqdirlanadi. Bu haqda Maktabgacha va maktab ta’limi vazirligi matbuot xizmati xabar berdi.
Qayd etilishicha, Prezident tashabbusi bilan joriy etilgan tanlovda respublika bo‘ylab 46 ming nafardan ortiq pedagog ishtirok etgan. Ulardan 208 nafari g‘olib deb topilgan. Har bir g‘olibga bazaviy hisoblash miqdorining 1400 baravari miqdorida pul mukofoti beriladi.
To‘liq ro‘yxat bilan ushbu havola orqali tanishish mumkin.
Tanlov haqida
“Yil o‘qituvchisi” tanlovi Vazirlar Mahkamasining 2025-yil 28-apreldagi 264-son qarori asosida joriy etilgan bo‘lib, 2026-yildan boshlab har ikki yilda bir marta o‘tkaziladi. Unda oliy yoki birinchi malaka toifasiga hamda kamida besh yillik pedagogik ish stajiga ega umumta’lim maktablari o‘qituvchilari qatnashishi mumkin.
Tanlov uch bosqichdan iborat. Dastlab pedagoglarning mutaxassislik fani va kasbiy bilimlari sinovdan o‘tkaziladi. Keyingi bosqichda ularning dars o‘tish mahorati, yakuniy bosqichda esa ma’naviy-ma’rifiy faoliyati va kitobxonlik darajasi baholanadi. G‘oliblar Maktabgacha va maktab ta’limi vaziri jamg‘armasi mablag‘lari hisobidan mukofotlanadi.
