Yaponiya O‘zbekistondan haydovchilar, muhandislar va IT mutaxassislarini qidirmoqda
Migratsiya agentligining Yaponiyaning Yamagata prefekturasi delegatsiyasi bilan o‘tkazgan uchrashuvida kadrlarni bevosita O‘zbekistonning o‘zida Yaponiya korxonalari talabi bo‘yicha tayyorlash kelishib olindi.
Professional haydovchilarni tayyorlash maqsadida Toshkent viloyatida o‘ng rulli yuk avtomobillarida amaliyot o‘tash uchun maxsus maydon tashkil etilmoqda. Ushbu hududda Yaponiyaning haqiqiy yo‘l sharoiti modellashtirilib, nomzodlarning mahorati xorijga ketishdan oldinroq sinovdan o‘tkaziladi. Shu bilan birga, yaponiyalik ish beruvchilarga nomzodlarni o‘qitishi uchun 400 o‘rinli yotoqxonaga ega INTIL markazi infratuzilmasidan bepul foydalanish taklif qilindi.
Uchrashuvda haydovchilar bilan birga muhandislar hamda IT mutaxassislarini ham jalb etish masalalari ko‘rib chiqildi. Jumladan, Yaponiyaning Abe Engineering kompaniyasi muhandislarni stajirovkaga qabul qilishga, MSI kompaniyasi esa axborot texnologiyalari sohasi vakillari bilan hamkorlik qilishga qiziqish bildirgan. Texnik oliygohlar talabalari uchun yapon tili kurslarini yo‘lga qo‘yish rejalashtirilmoqda.
Loyiha doirasidagi aniq ish o‘rinlari soni, oylik maoshlar miqdori hamda ishga qabul qilish boshlanadigan muddatlar tez orada ma’lum qilinadi. 2027-yilning boshida esa Yamagata prefekturasida O‘zbekiston kadrlar salohiyatining maxsus taqdimoti o‘tkazilishi ko‘zda tutilgan.
