Yangi Qarshi shahri 1 million aholiga mo‘ljallanib, kelajakda viloyat hokimligi hamda yerusti metrosi shu yerga ko‘chirilishi kutilmoqda
Samarqand va Shahrisabz yo‘nalishidagi avtomobil yo‘llari oralig‘idan tanlab olingan 5 200 gektarlik foydalanilmayotgan cho‘l maydoni kelajakda viloyatning asosiy zamonaviy markaziga aylantiriladi.
Dastlabki bosh reja 500 ming kishiga mo‘ljallangan bo‘lsa-da, loyihani istiqbolda 1 million aholi yashaydigan yirik megapolis sifatida rejalashtirish topshirildi. Yangi hududga viloyat hokimligi va barcha davlat idoralari ko‘chirilishi rejalashtirilgan. Shuningdek, xalqaro forumlarni o‘tkazish uchun kongress-xollar, konsert zallari va mehmonxonalar barpo etiladi.
Aholi hamda mehmonlar harakatlanishi uchun aeroport va temir yo‘l vokzalini shahar bilan bog‘laydigan va yo‘lovchi tashishga moslashgan ekologik jamoat transporti, zarurat tug‘ilganda esa yerusti metrosi yo‘lga qo‘yilishi belgilandi.
Shu bilan birga, Qarshi magistral kanali bo‘yidagi 235 gektar maydonda to‘rt bosqichli turizm majmuasi quriladi. Uch kilometrlik sayilgohni o‘z ichiga oladigan ushbu hududda hunarmandlar shaharchasi, mehmonxonalar, akvapark, muzey va qayiqlar suzadigan sun’iy ko‘l barpo etilishi ko‘zda tutilgan. Barcha bosh rejalar nufuzli xorijiy kompaniyalar bilan hamkorlikda “aqlli shahar” tamoyili asosida ishlab chiqiladi.
