Xorazmda oilaning 4 a’zosi bayramdan qolgan ovqatni yeb, vafot etdi
Bosh prokuratura matbuot kotibi Hayot Shamsutdinov Portal24.uz’gama’lum qiladiki, holat yuzasidan tegishli modda bo‘yicha jinoyat ishi qo‘zg‘atilgan.
Dastlabki ma’lumotlarga ko‘ra, oila a’zolari 8 oktyabr kuni avvalgi kungi tug‘ilgan kun bayramidan qolgan oziq-ovqat mahsulotlarini iste’mol qilganidan so‘ng zaharlanish alomatlari kuzatilgan. Fojia sabablarini aniqlash maqsadida sud-tibbiy ekspertizasi tayinlangan.
Hodisa yuzasidan viloyat Favqulodda vaziyatlar boshqarmasi, Sanitariya-epidemiologik osoyishtalik va jamoat salomatligi xizmati hamda Sog‘liqni saqlash boshqarmasi mutaxassislari jalb etilgan holda tekshiruv ishlari olib borilmoqda.
Insonlar o‘limiga sabab bo‘lgan, xavfsizlik talablariga javob bermaydigan mahsulotlar va xizmatlar bilan bog‘liq jinoyat alomatlari mavjudligi sababli, 10 oktyabr kuni Jinoyat kodeksining 276-11-moddasi 4-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
