Toshkentning 11 gektarlik “Elbek” bog‘ida 5 mingga yaqin daraxt va xavfli shox-shabbalar yoppasiga ko‘rikdan o‘tkazilmoqda
Toshkent shahar hokimligi matbuot xizmati bergan ma’lumotga ko‘ra, mutaxassislar tomonidan o‘simliklarning parvarishga ehtiyoji aniqlanib, hududiy infratuzilmani tartibga keltirish ishlari olib borilmoqda.
Ko‘rik davomida ekolog va dendrologlar qurigan, kasallangan hamda yo‘lovchilar xavfsizligiga tahdid soluvchi shox-shabbalarni aniqlab, ularni shakllantirish ishlarini bajarmoqda. Butunlay qurib qolgan daraxtlar bo‘yicha tegishli dalolatnomalar tuzilib, ularni Hududiy ekologiya boshqarmasi ruxsati bilan olib tashlash choralari ko‘rilmoqda.
Parallel ravishda bog‘ hududidagi piyodalar yo‘laklari chiqindilardan tozalanib, sug‘orish tizimlari kapital ta’mirlanmoqda va yangi suv tarmoqlari yotqizilmoqda. Bunday kompleks nazorat va obodonlashtirish tadbirlari poytaxtning Bunyodkor, Nukus, Ahmad Donish ko‘chalari hamda Kichik halqa avtomobil yo‘li bo‘ylab ham faol davom ettirilmoqda.
Shahar miqyosida nasos stansiyalarini yangilash, ariq va drenaj tarmoqlarini tozalash ishlari bilan birga, navbatdagi mavsumiy ko‘kalamzorlashtirish va ko‘chat ekish ishlariga tayyorgarlik ko‘rilmoqda.
