Toshkentda qizamiqqa qarshi 78 mingdan ortiq kishi emlandi
Toshkent shahar Sanitariya-epidemiologik osoyishtalik va jamoat salomatligi boshqarmasi xabariga ko‘ra, reja asosida 90 261 nafar bolaga qizamiq, parotit va qizilchaga qarshi KPK vaksinasi yuborilgan.
Epidemiologik surishtiruvlar davomida qizamiqqa gumon qilingan 290 nafar bemor bilan muloqotda bo‘lgan 10 mingdan ortiq shaxs aniqlangan. Ularning orasida ilgari emlangani haqida ma’lumotga ega bo‘lmagan 1 623 nafar fuqaro tezkorlik bilan vaksina bilan qamrab olindi. Rejali emlash doirasida bir yoshli 47,4 mingdan ziyod va olti yoshli 42,7 mingdan ortiq bola emlandi.
Shu bilan birga, mutaxassislar tomonidan ko‘kyo‘tal va difteriya kasalliklariga tashxis qo‘yish hamda oldini olish bo‘yicha laboratoriya tekshiruvlari o‘tkazildi. Ko‘kyo‘tal bo‘yicha 118 kishi, difteriya bo‘yicha esa 4,3 mingdan ortiq fuqaro tekshiruvdan o‘tkazilib, birorta ham xavfli holat yoki ijobiy natija qayd etilmadi.
Sanitariya xizmati mas’ullari kasalliklar tarqalishining oldini olish va bolalar salomatligini himoya qilish uchun emlash taqvimiga qat’iy rioya etish zarurligini eslatib o‘tdi.
