Toshkentda qizamiq bilan kasallanish ko‘rsatkichlari 40 foizga kamaydi

Raqamlarga ko‘ra, 2026-yilning o‘tgan to‘qqiz oyida qizamiq bilan kasallanish ko‘rsatkichi 2025-yilning mos davriga nisbatan 40 foizga kamaygan. Tarmoqlarda tarqalgan 290 ta gumon qilingan holat hamda 10 mingdan ziyod muloqotda bo‘lganlar haqidagi ko‘rsatkichlar esa bir kunlik yoki qisqa muddatli emas, balki to‘qqiz oy davomidagi jamlanma statistikadir.

Sanitariya xizmati tarqalayotgan ma’lumotlarni noto‘g‘ri talqin qilmaslikka chaqirib, profilaktika ishlari reja bo‘yicha ketayotganini bildirdi. Joriy yilning o‘tgan davrida Toshkent bo‘yicha 90 mingga yaqin 1 va 6 yoshli bolalar qizamiq, epidparotit hamda qizilchaga qarshi reja asosida emlangan.