Toshkent viloyatida 3-oktyabrdan ichimlik va oqova suv narxlari oshiriladi

Qayd etilishicha, yangi narxlar Xalq deputatlari Toshkent viloyati Kengashining 16-sentabrdagi qarori bilan tasdiqlangan. Unga ko‘ra, ichimlik suvi va oqova suv xizmatlari uchun quyidagi tariflar belgilanmoqda:

Ichimlik suvi (1 kub metr uchun):

• Aholi — 3 472 so‘m;
• Budjet tashkilotlari — 17 920 so‘m;
• Ulgurji iste’molchilar — 17 920 so‘m.

Oqova suv xizmati (1 kub metr uchun):

• Aholi — 1 680 so‘m;
• Budjet tashkilotlari — 4 480 so‘m;
• Ulgurji iste’molchilar — 4 480 so‘m.

Ma’lum qilinishicha, so‘nggi besh yilda Toshkent viloyatida markazlashgan ichimlik suvi bilan ta’minlanish darajasi 57 foizdan 82 foizga, kanalizatsiya qamrovi esa 19 foizdan 23 foizga yetkazilgan.

Kelgusi besh yilda ichimlik suvi ta’minotini 95 foizga, kanalizatsiya qamrovini esa 45 foizga yetkazish rejalashtirilgan. Buning uchun 7,88 trillion so‘m mablag‘ hisobidan yangi ichimlik suvi va kanalizatsiya tarmoqlari, 225 ta suv hamda 48 ta kanalizatsiya inshooti qurilishi ko‘zda tutilgan.

Hozirda viloyatdagi 862 ta suv inshootining 197 tasi, ya’ni 22,8 foizi ta’mirtalab holatda. 2026-yilda 50 milliard so‘m hisobidan 166,7 kilometr ichimlik suvi tarmog‘ini rekonstruksiya qilish belgilangan.

Shuningdek, elektr energiyasi narxining oshishi, ish haqi, soliq va xorijiy kreditlar bo‘yicha to‘lovlar hamda tizimni modernizatsiya qilish xarajatlari ichimlik suvi tannarxiga ta’sir ko‘rsatayotgani bildirilgan.