Toshkent ko‘chalarida, bozorlar va metro bekatlari yaqinida 100 ta yangi hojatxona quriladi
Qarorga ko‘ra, ushbu obyektlar uchun yer uchastkalari tadbirkorlarga 10 yilgacha muddatga ijaraga beriladi.
Yangi hojatxonalar aholi va shaharga keluvchilar eng ko‘p to‘planadigan manzillar – metro bekatlari, savdo majmualari, parklar va shifoxonalar yaqinida barpo etiladi. Jumladan, “Qo‘yliq”, “Turon” hamda “Mashinasozlar” metro bekatlari, Compass savdo markazi, “Yangi O‘zbekiston” bog‘i va Oloy bozori hududida maxsus yer maydonlari ajratilishi belgilangan.
Shuningdek, “O‘zekspomarkaz” kirish qismi, Xotira maydoni, Alfraganus universiteti hamda sobiq Semashko shifoxonasi atroflarida ham shunday zamonaviy shoxobchalar ishga tushiriladi. Yer uchastkalarining aniq chegaralari kadastr hujjatlarida aks ettirilib, hududlar investorlarga alohida yoki yagona lot shaklida taqdim etilishi ko‘zda tutilgan.
Qarorda hojatxonalardan foydalanish narxlari hamda ularni topshirishning aniq muddatlari ochiqlanmagan bo‘lsada, obyektlar shaharsozlik normalari va qurilish qonunchiligi talablariga to‘liq mos ravishda qad rostlashi belgilab qo‘yildi.
