Shahrisabzda tugallanmagan uyning 3-qavatiga avtomobil qo‘yilgani uchun mas’ullar jarimaga tortildi
Qashqadaryo viloyati qurilish inspeksiyasi Shahrisabz hududida joylashgan qavatli uyda xavfsizlik texnikasi buzilgani bo‘yicha mas’ul shaxslarga yozma ko‘rsatma berib, ma’muriy jarima qo‘lladi.
Holat ijtimoiy tarmoqlarda tarqalgan videolavhadan so‘ng inspeksiya nazoratiga olingan. Tekshiruvda qurilish-montaj ishlari hali davom etayotgan obyektda avtomobil aynan tugallanmagan xonadon ichida turgani tasdiqlangan.
Inspeksiya bu holatni SHNQ 3.01.02-23 “Qurilishda xavfsizlik texnikasi” talablariga zid deb baholagan. Qoidalarga ko‘ra, qurilish ketayotgan obyektda xavfsizlikka qat’iy rioya etilishi shart. Tugallanmagan binoning yuqori qavatiga avtomobil chiqarish konstruksiyalarga ortiqcha yuk tushirishi, ishchilar va boshqa shaxslar hayoti hamda sog‘lig‘iga xavf tug‘dirishi mumkin.
Jarima mashina egasiga emas, ruxsat bergan mas’ul shaxslarga qo‘llangan. Inspeksiya bunday obyektlarda shaharsozlik normalari va texnika xavfsizligi ustidan nazoratni davom ettirishini ma’lum qilgan.
