Rossiya harbiylari O‘zbekiston keldi. Ular “Hamkorlik-2026” o‘quv-mashg‘ulotlarida qatnashadi
Rossiya harbiy xizmatchilari “Hamkorlik-2026” qo‘shma o‘quv-mashg‘ulotlarida ishtirok etish uchun O‘zbekistonga yetib keldi. Bu haqda Rossiya Mudofaa vazirligi xabar berdi.
Ma’lum qilinishicha, harbiy bo‘linmalar Tojikiston va O‘zbekiston tog‘lari bo‘ylab 300 kilometrdan ortiq masofani bosib o‘tgan holda O‘zbekistonning “Termiz” poligoniga yetib borgan.
“Hamkorlik-2026” qo‘shma taktik o‘quv-mashg‘ulotlari 20-27-oktyabr kunlari Surxondaryo viloyatidagi “Termiz” poligonida o‘tkaziladi. Mashg‘ulotlar davomida O‘zbekiston va Rossiya harbiy xizmatchilari chegaraoldi hududlarda shartli dushman guruhlarini aniqlash va yo‘q qilish bo‘yicha tajribani birgalikda mustahkamlaydi. Mashg‘ulotlarda razvedka va zarba beruvchi dronlar, yerusti robotlashtirilgan platformalari va “Mi-24” vertolyotlaridan foydalaniladi.
Rossiya harbiylari o‘zlari bilan “BTR-82A” zirhli transport vositalari, “Ural” yuk mashinalari va “KamAZ” bazasidagi maxsus texnikalarni olib kelgan.
Ma’lumot uchun, ikki davlat harbiylari o‘tgan yili “Hamkorlik-2025” qo‘shma mashg‘ulotlarini o‘tkazgan edi.
