Qashqadaryoda 2300 yillik qadimiy otashgoh va ossuariy topildi
Qashqadaryo viloyatining Qamashi tumanidagi Odirmon yodgorligida qadimiy otashgoh va inson suyaklarini saqlashga mo‘ljallangan sopol idish — ossuariy aniqlandi.
Topilmalar miloddan avvalgi III asrdan milodiy III asrgacha bo‘lgan davrga oid ekani taxmin qilinmoqda. Bu haqda “La Brújula Verde” jurnali xabar berdi.
Qayd etilishicha, joriy yilda arxeolog Sanjar Abdurahimov boshchiligida boshlangan qazishmalar davomida balandligi 70 santimetr, kengligi 90 santimetr bo‘lgan otashgoh topilgan. Uning yonidan kiyik va Turkiston archasi tasvirlari bilan bezatilgan ossuariy ham aniqlangan. Naqshlarning ma’nosi restavratsiya ishlaridan so‘ng oydinlashishi kutilmoqda.
Mutaxassislarning fikricha, topilmalar zardushtiylik bilan bog‘liq qadimiy dafn marosimlariga oid bo‘lishi mumkin. Mazkur e’tiqodda marhumlarning suyaklari tozalanib, maxsus idishlarda saqlangan. Yodgorlikning davri tasdiqlansa, u mintaqadagi qadimgi diniy e’tiqodlar va dafn an’analarini o‘rganishda muhim manba bo‘lishi mumkin.
Hozirda arxeologlar Odirmon yodgorligining tarixiy vazifasi va maqomini aniqlash maqsadida qazish ishlarini davom ettirmoqda.
- #topilma
- #ossuariy
- #otashgoh
- #Qashqadaryo
