O‘zbekistonda valyutaga bo‘lgan talab 44 milliard dollardan oshib ketdi
Ushbu davrda xorijiy valyuta xaridining asosiy ulushi yuridik shaxslarga to‘g‘ri kelib, ular tomonidan 34,7 milliard dollar sotib olindi. Fuqarolar esa sakkiz oy davomida jami 9,6 milliard dollar miqdorida chet el valyutasini xarid qilishgan.
Talab bilan birga ichki bozordagi taklif hajmi ham sezilarli darajada kengaydi. Ko‘rsatkichlar o‘tgan yilga nisbatan 25,5 foizga o‘sib, 38,2 milliard dollarni tashkil etdi. Ushbu davrda aholi tijorat banklariga 16,6 milliard dollar sotgan bo‘lsa, yuridik shaxslar tomonidan taklif etilgan valyuta miqdori 21,6 milliard dollarga yetdi.
Ko‘rib chiqilgan davr mobaynida milliy valyuta kursi bir AQSH dollari uchun 11 779–12 320 so‘m oralig‘ida o‘zgarib turdi va umumiy hisobda 1,5 foizga qadrsizlandi. Banklararo bozorda kursning o‘rtacha kunlik tebranuvchanligi barqaror saqlanib, 0,27 foizni tashkil qildi.
