O‘zbekistonda san’atkorlar va konsert tashkilotchilarining faoliyati elektron tizim orqali baholanib, xavf toifalariga ajratiladi
Madaniyat vazirligi tomonidan tasdiqlangan hamda Adliya vazirligida ro‘yxatdan o‘tkazilgan ushbu yangi nizom 2027-yilning yanvar oyidan boshlab kuchga kirishi belgilangan.
Mazkur tizimni “O‘zbekkonsert” davlat muassasasi avtomatik tarzda qo‘llaydi. Baholash jarayonida sakkizta asosiy ko‘rsatkich bo‘yicha ballar ajratilib, eng yuqori ko‘rsatkich 100 ballni tashkil etadi.
Xususan, litsenziyasiz faoliyat yuritish, chiqishlarda dinni targ‘ib qilish, shuningdek, san’atkorlarning odob-axloq va sahna madaniyatiga zid harakatlari, jumladan, ma’naviyatga salbiy ta’sir ko‘rsatuvchi qo‘shiqlarni ijro etishi uchun eng yuqori jarima ballari ko‘zda tutilgan.
Shu bilan birga, konsert xizmatlarini shartnomasiz ko‘rsatish, xorijdagi chiqishlar haqida hududiy bo‘linmalarni xabardor qilmaslik hamda choraklik hisobotlarni topshirmaslik ham xavf ballarini oshirishga sabab bo‘ladi. Baholash jarayonida OAV, ijtimoiy tarmoqlar hamda fuqarolarning murojaatlarida keltirilgan ma’lumotlardan ham foydalanilishi belgilangan.
Tizim aniqlagan xavf darajasining o‘zi tadbirkor faoliyatiga bevosita aralashishga yoki unga chora ko‘rishga asos bo‘la olmaydi. Tahlil yakunlariga ko‘ra, faqat o‘rta va yuqori xavf toifasiga kiritilgan vakillar doirasida profilaktik tadbirlar hamda tekshiruvlar o‘tkaziladi, xavf darajasi past bo‘lgan tadbirkorlar esa tekshiruvlardan xoli bo‘ladi.
