O‘zbekistonda ish joyida tazyiq va zo‘ravonlik haqida onlayn xabar berish mumkin bo‘ladi
Ish joylarida tazyiq va zo‘ravonlikning oldini olishga qaratilgan maxsus dastur joriy etiladi. Davlat tashkilotlari xodimlari bunday holatlar yuzasidan onlayn murojaat qilishi mumkin bo‘ladi. Shikoyat rahbar yoki mas’ul xodimning o‘ziga nisbatan bo‘lsa, u avtomatik ravishda yuqori turuvchi tashkilotga yuboriladi.
O‘zbekistonda mehnat sohasida xavfsiz va hurmatga asoslangan ish muhitini ta’minlash dasturi bosqichma-bosqich joriy etiladi. Bu prezidentning 21-sentabrda qabul qilingan “Mehnat sohasida xavfsiz va hurmatga asoslangan ish muhitini ta’minlash chora-tadbirlari to‘g‘risida”gi PQ–345-sonli qarorida belgilandi.
Qarorga ko‘ra, dastur davlat tashkilotlari, davlat ulushi 50 foiz va undan ortiq bo‘lgan korxonalar, ularga qarashli tashkilotlar, shuningdek, mulkchilik shaklidan qat’i nazar, boshqa korxona va muassasalarda amalga oshiriladi.
2026-yil 1-dekabrga qadar davlat organlari va tashkilotlari uchun “Xavfsiz va hurmatga asoslangan ish muhiti” axborot portali ishga tushiriladi.
Portal orqali xodimlar ish joyidagi tazyiq va zo‘ravonlik holatlari yuzasidan onlayn murojaat qilishi mumkin bo‘ladi. Agar shikoyat mas’ul xodim, uning bevosita rahbari yoki tashkilot mansabdor shaxsiga nisbatan bo‘lsa, murojaat avtomatik ravishda yuqori turuvchi tashkilotga yuboriladi.
Shuningdek, murojaatlarni tekshirish, dalillarni to‘plash, xulosalar tayyorlash va axborot almashish jarayonlari ham portal orqali amalga oshiriladi.Tekshiruv natijalari, ko‘rilgan choralar va ularga kiritilgan o‘zgarishlar haqidagi ma’lumotlar tizimda saqlanadi. Ularning yo‘q qilinishiga yo‘l qo‘yilmaydi.
Agar murojaatda ma’muriy huquqbuzarlik yoki jinoyat alomatlari aniqlansa, u “112” yagona dispetcherlik xizmati orqali vakolatli organlarga yuboriladi. Boshqaruv samaradorligi agentligiga esa dastur ijrosini portal orqali nazorat qilish hamda aniqlangan qoidabuzarliklarni bartaraf etish bo‘yicha ko‘rib chiqilishi majburiy bo‘lgan taqdimnomalar kiritish vakolati beriladi.
