O‘zbekistonda arizasiz tayinlanadigan pensiya va to‘lovlar ro‘yxati tasdiqlandi
Hukumatning tegishli qaroriga ko‘ra, endilikda qator pensiya va qo‘shimcha to‘lovlar avtomatik tarzda, hech qanday arizalarsiz rasmiylashtiriladi hamda to‘lab boriladi.
Yangi tartibga asosan, nogironlik guruhi qayta belgilanganda yoki muddati uzaytirilganda, I guruh nogironligi tayinlanganda pensiyani davom ettirish va qayta hisoblash arizasiz bajariladi. Shuningdek, oila a’zolari soni o‘zgarganda boquvchisini yo‘qotganlik pensiyasini to‘lash, 100 yoshga to‘lgan shaxslarga ustama belgilash hamda ID-karta muddati yangilanishi munosabati bilan to‘lovlarni uzaytirish ham avtomatlashtiriladi.
Shu bilan birga, 2026-yilning oktyabr-dekabr oylarida pensiyalarni tayinlashning ixchamlashtirilgan tizimi to‘rtta hududda tajriba-sinovdan o‘tkaziladi. Tajriba proyekti Andijon, Samarqand va Xorazm viloyatlarining bir nechta shahar va tumanlarini hamda Sirdaryo viloyatining barcha hududlarini qamrab oladi. Ushbu joylarda tuman bo‘limlarining ayrim vakolatlari viloyat boshqarmalariga o‘tkaziladi.
Qaror bilan xorijda bo‘lib turgan pensionerlar uchun ham qulaylik yaratish ko‘zda tutilgan. Xususan, Pensiya jamg‘armasiga bir oy muddatda "MyID" tizimi orqali masofadan turib shaxsni tasdiqlash hamda pensiya olish huquqini qayta qayd etish imkoniyatini yo‘lga qo‘yish vazifasi topshirildi.
