O‘zbekistonda 3 mlnga yaqin odam o‘ziga kredit olishni taqiqladi
O‘zbekistonda 2026-yil 1-oktyabr holatiga ko‘ra, 2 million 841 ming 475 nafar jismoniy shaxs “Kreditga taqiq” xizmatiga ulangan. Bu haqda Kredit-axborot tahliliy markazi (KATM) xabar berdi.
E'lon qilingan statistikaga ko‘ra, xizmatdan foydalanuvchilarning 1 million 656 ming 387 nafari erkaklar, 1 million 185 ming 88 nafari esa ayollardir.
Bir necha oy oldin, 1-iyulda xizmatga ulanganlar soni 2 million 574 ming 26 nafarni tashkil etgandi. Shu tariqa, uch oy ichida foydalanuvchilar soni 267 ming 449 nafarga yoki 10,4 foizga oshgan.
Kredit olishga taqiq qanday qo‘yiladi?
Kredit olishni taqiqlash xizmatini yoqish yoki o‘chirishni onlayn va oflayn shaklda bir nechta usullar orqali amalga oshirish mumkin:
Kredit-axborot tahliliy markazi mobil ilovasi orqali – “Ommabop xizmatlar” bo‘limidan “Kreditga taqiq” xizmati orqali ( Android, iOS va Huawei AppGallery);
Kredit byurosining veb saytida shaxsiy kabinet yoki Call-markaz (+998 712034747) orqali;
Yagona interaktiv davlat xizmatlari portalida “Kredit bitimini tuzishga taqiq qo‘yish yoki taqiqni olib tashlash” xizmati orqali;
Davlat xizmatlari markazlari orqali.
O‘ziga kredit olishni taqiqlash imkoniyati jismoniy shaxs nomiga uning ishtirokisiz yoki xabarisiz kredit bitimini rasmiylashtirish bilan bog‘liq firibgarliklarning oldini olish maqsadida yo‘lga qo‘yildi. O‘zbekistonda 5 yilda kiberjinoyatlar bilan 1,9 trln so‘mdan ortiq pul talon-toroj qilingan bo‘lib, 4 foizi shaxs nomiga onlayn kredit rasmiylashtirish orqali amalga oshirilgan.
