OTMda kontrakt to‘lash va talabalikka qabul qilish muddati uzaytirildi
Ushbu imkoniyat oliy ta’lim tizimidagi bir qancha toifadagi abituriyentlar va talabalarga birdek taalluqli hisoblanadi. Xususan, ajratilgan muddat bakalavriat hamda magistratura bosqichlariga talabalikka tavsiya etilganlar, o‘qishi boshqa OTMdan ko‘chirilgan yoki ko‘chirib tiklanganlar, shuningdek, talabalar safiga qayta tiklangan shaxslar uchun ham amal qiladi.
Belgilangan tartib va shartnoma shartlariga ko‘ra, 15-oktyabrga qadar moliyaviy to‘lovlarning tegishli minimal miqdori to‘lanishi va hujjatlar to‘liq rasmiylashtirilishi shart. Bazaviy to‘lov-kontrakt asosida tahsil oluvchilar belgilangan yillik summaning kamida 25 foizini OTM hisobiga o‘tkazishlari lozim.
Tabaqalashtirilgan (super) to‘lov-kontrakt asosida o‘qishga qabul qilinayotgan abituriyentlar uchun esa talab nisbatan yuqoriroq bo‘lib, ular belgilangan yillik summa qiymatining kamida 50 foizini ko‘rsatilgan muddatgacha to‘lashlari talab etiladi.
