Namanganda guruh bo‘lib talonchilik qilgan o‘smirlarga jinoiy ish qo‘zg‘atildi
Namangan shahrida texnikumning birinchi bosqichida tahsil oluvchi 7 nafar o‘smir to‘rt nafar tengdoshining pul, telefon va soatlarini zo‘rlik ishlatib tortib olgani aniqlandi. Holat yuzasidan jinoyat ishi qo‘zg‘atilib, tergov harakatlari boshlandi. Bu haqda Namangan viloyati IIB axborot xizmati xabar berdi.
Ijtimoiy tarmoqlarda bir guruh voyaga yetmagan shaxslar boshqa o‘smirlarning buyumlarini kuch ishlatib olib qo‘yayotgani aks etgan video tarqaldi. Namangan viloyati IIB holatni o‘rganib, voqea 19-sentabr kuni soat 13:00 larda Namangan shahrining Dashtbog‘ mahallasida sodir bo‘lganini aniqladi.
Ma’lum qilinishicha, Namangan shahri va Yangi Namangan tumanida yashovchi, 2010-yilda tug‘ilgan 7 nafar o‘smir 2-sonli kasb-hunar texnikumining birinchi bosqichida tahsil oladi. Ular shu texnikumda o‘qiydigan to‘rt nafar tengdoshining yonidagi pul, qo‘l soati va telefonlarini ochiqdan-ochiq zo‘rlik ishlatish orqali tortib olgan.
Tergovga qadar tekshiruv davomida videoda ko‘ringan barcha ishtirokchilarning shaxsi aniqlangan. IIB ma’lumotiga ko‘ra, hodisa oqibatida hech kim tan jarohati olmagan.
Mazkur holat yuzasidan Namangan shahar IIB huzuridagi Tergov bo‘limi tomonidan Jinoyat kodeksining 166-moddasi 2-qismi “v” bandi (bir guruh shaxslar tomonidan sodir etilgan talonchilik) bilan jinoyat ishi qo‘zg‘atilgan. Hozirda dastlabki tergov harakatlari davom etmoqda.
