Markaziy Osiyoda o‘zaro savdo chorak barobarga oshib, 8,1 milliard dollarni tashkil qildi
Mintaqa bo‘yicha eng yirik eksportchi mavqeini Qozog‘iston saqlab qoldi. Mamlakatning qo‘shni davlatlarga amalga oshirgan eksport hajmi 4,537 milliard dollarga yetib, umumiy mintaqalararo eksportning 55,9 foizini tashkil etdi. Ikkinchi o‘rindagi O‘zbekiston esa 2,003 milliard dollarlik ko‘rsatkich bilan 24,7 foizlik ulushga ega bo‘ldi. Shu tariqa, Toshkent va Ostona birgalikda ichki savdo aylanmasining asosiy qismini ta’minlab berishdi.
O‘zaro eksport hajmlari bo‘yicha Turkmaniston 844 million dollar, Qirg‘iziston 523 million dollar hamda Tojikiston 209 million dollarlik natija ko‘rsatishgan. Shu bilan birga, mintaqaviy savdoning umumiy tashqi savdodagi salmog‘i mamlakatlar kesimida farq qilmoqda. Jumladan, ushbu ko‘rsatkich Qirg‘iziston tashqi savdosida 19,9 foizni, Tojikistonda 17,6 foizni, O‘zbekistonda 10,9 foizni va Qozog‘istonda 6,7 foizni tashkil etgan.
Tahlilchilarning ta’kidlashicha, ushbu raqamlar har bir davlatning mintaqaviy iqtisodiy aloqalarga qanchalik darajada qo‘shilganini yaqqol ko‘rsatadi. Umuman olganda, joriy yilning dastlabki yetti oyidagi statistik ko‘rsatkichlar Markaziy Osiyo mamlakatlari o‘rtasidagi savdo-iqtisodiy integratsiya izchil rivojlanib borayotganidan dalolat beradi.
