Magistraturada 1 yillik amaliy o‘quv yo‘nalishlari tashkil etilib, uning bitiruvchilariga dissertatsiyasiz diplom beriladi
Yangi tartibga ko‘ra, ishlab chiqarish yoki amaliyotga yo‘naltirilgan magistraturada o‘qish muddati kamida 1 yil, ilmiy-pedagogik yo‘nalishda esa kamida 2 yil etib belgilandi. O‘qish jarayoni kunduzgi, kechki hamda masofaviy shakllarda tashkil etilishi ko‘zda tutilgan bo‘lib, magistraturada o‘qishning aniq davomiyligi mutaxassislik xususiyatiga qarab Oliy ta’lim, fan va innovatsiyalar vazirligi tomonidan muvofiqlashtiriladi.
Bosqichni tamomlash talablarida ham jiddiy o‘zgarishlar joriy etilmoqda. Amaliy magistratura bitiruvchilari an’anaviy ilmiy ish o‘rniga o‘z yo‘nalishiga mos ravishda loyiha ishi, startap, ratsionalizatorlik g‘oyasi yoki amaliy-ijodiy ish tayyorlab himoya qiladilar. Ilmiy-pedagogik yo‘nalish talabalari esa dissertatsiya yozishadi va ushbu ishlar dastlabki himoyagacha plagiatga tekshirilib, yashirin ekspert taqrizidan o‘tkaziladi.
Shuningdek, Scopus va Web of Science bazalaridagi jurnallarda maqola chop etgan talabalarni rag‘batlantirish tizimi yo‘lga qo‘yiladi.
Ushbu yangilangan qoidalar barcha davlat OTMlariga tatbiq etilsa-da, bir qator ixtisoslashgan muassasalarga nisbatan qo‘llanilmaydi. Xususan, Odil sudlov akademiyasi, Davlat siyosati va boshqaruvi akademiyasi, Bank-moliya akademiyasi, Biznes va tadbirkorlik oliy maktabi, Toshkent davlat yuridik universiteti hamda oliy harbiy va harbiylashtirilgan ta’lim tashkilotlari bundan mustasno hisoblanadi.
- #Magistratura
- #dissertatsiyasiz diplom
- #ilmiy-pedagogik yo‘nalish
