Ichimlik shishasi va bankalar uchun garov puli joriy etilib, bo‘sh idishni topshirganlarga puli qaytarilishi mumkin
Ekologiya va iqlim o‘zgarishi milliy qo‘mitasi vakilining Oliy Majlis Qonunchilik palatasida ma’lum qilishicha, hozirda ichimlik qadoqlarining atigi 6,2 foizi qayta ishlanmoqda va amaldagi tizim aholini chiqindini alohida yig‘ishga yetarlicha rag‘batlantirmayapti.
Yangi mexanizmga ko‘ra, ichimlik sotib olayotganda uning narxiga qadoq uchun qo‘shimcha garov puli qo‘shiladi. Xaridor bo‘sh idishni maxsus qabul punktiga topshirgach, o‘sha to‘lagan pulini to‘liq qaytarib oladi. Natijada idishni qaytarib bergan fuqarolar uchun mahsulot qimmatlashmaydi, Yevropa tajribasi asosida chiqindilarni qayta ishlash ulushi esa keskin oshadi.
Bugungi kunda mamlakatda har yili 15 million tonnadan ortiq maishiy chiqindi hosil bo‘layotgan bo‘lib, shuning atigi 5,2 foizi saralanmoqda. Shu bois deputatlar birinchi o‘qishda ma’qullagan “Chiqindilar to‘g‘risida”gi yangi qonun loyihasida qayta ishlashni iqtisodiy rag‘batlantirish hamda ishlab chiqaruvchilar mas’uliyatini oshirish choralari belgilangan.
Ma’lumot uchun, hozirda Toshkent shahri va Surxondaryo viloyatida Norvegiyaning TOMRA kompaniyasi bilan hamkorlikda maxsus avtomatlar sinovdan o‘tkazilmoqda. U yerda topshirilgan har bir idish uchun fuqarolarning Click elektron hamyoniga 150 so‘mdan o‘tkazib berilmoqda. Biroq depozit tizimi to‘liq yo‘lga qo‘yilishi uchun qabul qilish shoxobchalari infratuzilmasini yaratish va o‘tish davrini belgilash talab etiladi.
