Buxoroning eski shahar qismida samokatlar, mopedlar va hatto ot-tuyalar harakati taqiqlandi
Ushbu taqiq va cheklovlar Ark qal’asidan Poyi Kalon ansambli hamda Haqiqat ko‘chasi orqali Labi Hovuz majmuasigacha bo‘lgan hududni qamrab oladi. Hokimlik ushbu qarorni keyingi paytlarda tarixiy obidalar atrofida elektromobillar, rikshalar, velosiped va skuterlar soni keskin ko‘payib ketgani hamda ularning tartibsiz harakati sayyohlar va aholiga xavf tug‘dirayotgani bilan izohladi.
Rasmiy ma’lumotlarga ko‘ra, mazkur hududda foydalanilayotgan texnikalarning aksariyati yo‘lovchi tashish talablariga javob bermaydi va amaldagi qonunchilik mezonlariga mos kelmaydi. Shu sababli, 1-oktyabrdan boshlab elektrosamokatlar, mopedlar, rikshalar, to‘rt g‘ildirakli velosipedlar hamda kartinglar harakati cheklanadi. Shuningdek, xavfsizlik va tartibni saqlash maqsadida ushbu hududda ot va tuyalardan foydalanishga ham ruxsat berilmaydi.
Tarixiy markazda harakatlanish bo‘yicha mutlaq ustuvorlik mahalliy va xorijiy sayyohlar hamda piyodalar guruhlariga beriladi. Belgilangan hududga kirish hamda chiqish joylariga maxsus taqiqlovchi yo‘l belgilari va ko‘rsatkichlar o‘rnatilishi ko‘zda tutilgan.
