Toshkentda soxta hujjatlar bilan o‘qishga kiritishni va‘da qilgan IIO inspektori va yana ikki kishi ushlandi
Toshkentdagi xususiy oliygohning uchinchi bosqichiga soxta hujjatlar orqali o‘qishga kiritish bilan bog‘liq holat fosh etildi. Tezkor tadbirda ikki fuqaro va Yakkasaroy tumani IIO FMB inspektor-psixologi ushlandi. Bu haqda Davlat xavfsizlik xizmati xabar berdi.
DXXga ko‘ra, 1997-yilda tug‘ilgan shaxs fuqaroga Rossiyadagi OTMda ikki yil o‘qiganligi haqida soxta hujjatlar tayyorlatib, tanishlari orqali o‘qishini ko‘chirishni va’da qilgan. U buning uchun 8 ming dollar so‘rab, 7500 dollarni olayotganida ushlangan.
Tadbir davomida mazkur pulni undan olgan 1993-yilda tug‘ilgan fuqaro ham qo‘lga olingan. Keyingi tekshiruvlarda ishga aloqadorligi aniqlangan IIO inspektori ham 7500 dollarni qabul qilayotganida ushlangan.
Uchala shaxsga nisbatan jinoyat ishi qo‘zg‘atilib, tergov harakatlari olib borilmoqda.
