Sirdaryoda erining qonuniy rafiqasi va qizini pichoqlab o‘ldirgan shar’iy nikohdagi ayolga sud hukmi o‘qildi
Sirdaryo viloyati Shirin shahrida 2026-yil 29-aprel kuni 29 yoshli shar’iy nikohdagi ayol erining qonuniy rafiqasi va ikki nafar qiziga pichoq bilan hujum qilishi oqibatida ayol va uning besh yoshli qizi vafot etgan. Sud javobgar ayolga hukm o‘qidi.
Hodisa soat 17:00 atrofida Shirin shahridagi Farhod mahallasida yuz bergan. Shu kuni soat 18:20 larda bu haqda shahar IIBga xabar kelib tushgan.
Tergov ma’lumotlariga ko‘ra, 29 yoshli N.X. va uning shar’iy turmush o‘rtog‘i A.S. o‘rtasida rashk sabab janjal chiqqan. Shundan so‘ng ayol onasining uyidan oshxona pichog‘ini olib, erkakning oilasi yashaydigan xonadonga borgan va uning qonuniy rafiqasi M.S. hamda ikki qiziga tan jarohatlari yetkazgan.
Oqibatda M.S. va uning besh yoshli qizi vafot etgan. Uch yoshli qiz og‘ir ahvolda Shirin shahar tibbiyot birlashmasiga yotqizilgan. Hodisadan keyin voqea joyidan ketgan gumonlanuvchi ushlangan.
Sudda aniqlanishicha, ayol erkak bilan olti yildan buyon shar’iy nikoh asosida yashab kelgan. Ular o‘rtasidagi kelishmovchilikka erkakning qonuniy rafiqasi farzandli bo‘layotgani, sudlanuvchiga esa farzand ko‘rishga ruxsat berilmagani bilan bog‘liq bo‘lgan.
Sudlanuvchi qasddan odam o‘ldirish va odam o‘ldirishga suiqasd qilishda aybdor deb topildi. Unga jazolarni qisman qo‘shish yo‘li bilan 13 yil-u 4 oy muddatga ozodlikdan mahrum qilish jazosi tayinlandi. U jazoni umumiy tartibli koloniyada o‘taydi.
