Samarqandda arxeologik yodgorlikka 6,4 mlrd so‘mlik zarar yetkazildi
Samarqand viloyatining Pastdarg‘om tumanida joylashgan “Tallig‘ulontepa” arxeologik yodgorligiga og‘ir texnika yordamida zarar yetkazilgan. Bu haqda Madaniy meros agentligi xabar berdi.
Ijtimoiy tarmoqlarda yodgorlik buzib tashlanayotgani haqida xabarlar tarqalgach, viloyat Madaniy meros boshqarmasi mutaxassislari hududda o‘rganish o‘tkazgan. Unda yodgorlikning ayrim qismlari og‘ir texnika ta’sirida buzilgani tasdiqlangan. Shuningdek, hududga o‘rnatilgan muhofaza belgisi noma’lum shaxs tomonidan olib tashlangani aniqlangan.
Yetkazilgan moddiy zarar Vazirlar Mahkamasining 2019-yil 30-martdagi 265-son qarori bilan tasdiqlangan tegishli metodika asosida hisoblangan. 2026-yil 23-sentabrda amalga oshirilgan hisob-kitoblarga ko‘ra, zarar miqdori 6 mlrd 435 mln so‘mni tashkil etgan.
Holat bo‘yicha dalolatnoma rasmiylashtirilib, unga huquqiy baho berish uchun zarur hujjatlar Samarqand viloyati prokuraturasiga yuborilgan.
Ma’lumot uchun, “Tallig‘ulontepa” V–VI hamda X–XII asrlarga oid arxeologik yodgorlik hisoblanadi. U Vazirlar Mahkamasining 2019-yil 4-oktabrdagi 846-son qarori bilan Moddiy madaniy merosning ko‘chmas mulk obyektlari milliy ro‘yxatiga kiritilgan. Yodgorlik viloyat Madaniy meros boshqarmasiga operativ boshqaruv huquqi asosida biriktirilgan.
*illustrativ foto
