Registon haqidagi bahsli bayonotlar ortidan Eron elchisi O‘zbekiston Tashqi ishlar vazirligiga chaqirilib, rasmiy e’tiroz bildirildi
Uchrashuvda Eron diplomatiyasiga O‘zbekistonning qat’iy e’tirozini ifodalovchi rasmiy nota topshirildi.
Bunga AQSH Davlat kotibi Marko Rubioning Samarqandga tashrifi chog‘ida Registon maydonidan yo‘llagan murojaati va unga Eron diplomatik missiyalarining bildirgan reaksiyasi sabab bo‘ldi.
“Yer yuzida Samarqand kabi global savdoda tarixan muhim rol o‘ynagan joylar kamdan-kam uchraydi. Bugun bu yerda bo‘lib, nafaqat tarixni yodga olish, balki kelajak uchun imkoniyatlar haqida fikr yuritish men uchun sharafdir, deya ta’kidlagan edi Rubio o‘z murojaatida.
Ushbu bayonot ortidan Eronning Armanistondagi elchixonasi X ijtimoiy tarmog‘ida: “Tarixni o‘rganayotganingiz juda soz! Siz turgan bu joy Fors sivilizatsiyasi va me’morchiligining bir qismidir”, deb yozib qoldirgan.
Bundan tashqari, Eronning Bolgariya hamda Zimbabvedagi diplomatik idoralari ham Registon me’morchiligini fors-islom sivilizatsiyasiga tegishli deb e’lon qilgan.
O‘zbekiston Tashqi ishlar vazirligi uchrashuv davomida Samarqand, Buxoro va Xiva kabi shaharlar o‘zbek xalqining ko‘p asrlik davlatchilik hamda madaniy taraqqiyotining ajralmas qismi ekanini ko‘rsatib o‘tdi.
“O‘zbekiston Eron bilan o‘zaro hurmat va ishonchga asoslangan munosabatlarni qadrlaydi. Shu bilan birga, tarixiy-madaniy merosni biryoqlama talqin qilishga nisbatan prinsipial pozitsiyasini saqlab qoladi”, deyiladi vazirlik bayonotida.
Toshkent tomoni Eron diplomatik korpusidan ijtimoiy tarmoqlardagi tegishli xabarlarni zudlik bilan o‘chirib tashlashni hamda kelgusida tarixiy va madaniy masalalarni siyosiy vositaga aylantirish holatlariga yo‘l qo‘ymaslikni qat’iy talab qildi.
