Polshada fojiali tarzda halok bo‘lgan ikki nafar O‘zbekiston fuqarosining jasadi davlat hisobidan vatanga olib kelindi
Rasmiy ma’lumotlarga ko‘ra, fuqarolardan biri shu yilning 24-avgust kuni Olshtin shahrida balandlikdan yiqilib tushishi oqibatida og‘ir bosh miya jarohatini olib, voqea joyida vafot etgan. Diplomatik vakolatxona sa’y-harakatlari bilan marhumning jasadi 5-sentyabr kuni O‘zbekistonga olib kelingan va yaqinlariga topshirilgan.
Ikkinchi noxush holat Shetsin shahrida qayd etilgan bo‘lib, bu yerda fuqaro 5-sentyabr kuni og‘ir xastalik – qoqshol xuruji sababli hayotdan ko‘z yumgan. Polsha vakolatli idoralari bilan hamkorlikda barcha huquqiy va tashkiliy jarayonlar hal etilgach, u kishining jasadi ham 20-sentyabr kuni poytaxtimizga olib kelingan.
Har ikki holatda ham diplomatlar jarayonlarni to‘liq muvofiqlashtirib borgan va jasadlarni respublikaga olib kelish bilan bog‘liq barcha moliyaviy xarajatlar Migratsiya jamg‘armasi mablag‘lari hisobidan to‘liq qoplab berilgan.
