O‘zbekistonda eng yaxshi natija ko‘rsatgan davlat oliygohlariga moliyaviy erkinlik berilib, mablag‘ ajratish reytingga bog‘lanadi
Ta’lim sifatini ta’minlash milliy agentligi tomonidan ishlab chiqilgan yangi hujjat loyihasiga ko‘ra, oliygohlarning reytingini yuritish tartibiga bir qator jiddiy o‘zgartirishlar kiritilishi kutilmoqda.
Yangi tartibga ko‘ra, har bir toifadagi oliygohlar ko‘rsatkichlariga qarab uchta darajaga ajratiladi. Eng yuqori natija ko‘rsatgan 20 foiz oliygohlar birinchi, keyingi 40 foizi ikkinchi va qolganlari uchinchi darajaga kiritiladi. Davlat tomonidan ajratiladigan rag‘batlantirish mablag‘lari miqdori aynan ushbu darajalarga bog‘liq bo‘ladi hamda ta’lim muassasalari ushbu mablag‘larni sarflash yo‘nalishini mustaqil hal etadi.
Hujjatda baholash mezonlarini soddalashtirish hamda zamonaviylashtirish ko‘zda tutilgan. Xususan, bitiruvchilarning ishga joylashish muddati va daromadini alohida baholash o‘rniga "Bitiruvchi sifati indeksi" joriy etiladi va bu ko‘rsatkich uchun 20 balldan 40 ballgacha ajratiladi. Shuningdek, oliygohlarning ma’lumot topshirish muddati 1-fevraldan 1-iyunga ko‘chirilishi hamda 2027-yildan professor-o‘qituvchilar soni jami ish stavkalari yig‘indisi bo‘yicha hisoblanishi belgilangan.
Xalqaro nufuzga ega THE, QS va ARWU reytinglarining birinchi 1000 taligiga kirgan oliygohlar uchun milliy reyting alohida yuritilishi taklif qilinmoqda. Loyihaga ko‘ra, reytingda faqat bakalavriat bitiruvchilariga ega bo‘lgan ta’lim muassasalari qatnasha oladi. Ushbu o‘zgartirishlar hozirda muhokama jarayonida bo‘lib, loyiha ko‘rinishida turibdi.
