O‘zbekistonda elektromobillar savdosi o‘tgan yilning mos davriga nisbatan 44,5 foizga keskin o‘sdi
Iqtisodiy tadqiqotlar va islohotlar markazi tahlillariga ko‘ra, savdo ko‘rsatkichlarining yuqori sur’ati respublikaning deyarli barcha hududlarida kuzatildi. Bozordagi asosiy ulush an’anaviy ravishda poytaxt hissasiga to‘g‘ri kelib, Toshkent shahrida 6,3 mingta elektrokar sotildi va bu umumiy savdoning 68,5 foizini tashkil etdi. Hududlar kesimida keyingi o‘rinlarni 662 ta avtomobil ko‘rsatkichi bilan Farg‘ona viloyati va 455 ta savdo ko‘rsatkichi bilan Toshkent viloyati egalladi.
Shu bilan birga, sohaga bo‘lgan talabni yanada rag‘batlantirish maqsadida yangi elektromobillar xaridi uchun ajratiladigan avtokredit foizlarining bir qismini davlat tomonidan subsidiyalash rejalashtirilmoqda. Hukumat qarori loyihasiga ko‘ra, ushbu imtiyoz qiymati 1 000 baravar bazaviy hisoblash miqdorigacha bo‘lgan va faqat elektr energiyasida ishlaydigan M1 toifasidagi yangi transport vositalariga tatbiq etilishi ko‘zda tutilgan.
Moliyaviy qo‘llab-quvvatlash mexanizmi kreditning dastlabki ikki yili davomida yillik 16 foizdan yuqori bo‘lgan stavkalar uchun amal qiladi va kompensatsiya miqdori 8 foiz punktidan oshmaydi. Subsidiya doirasida ajratiladigan kreditning maksimal hajmi 300 million so‘m etib belgilanadi.
