Энди давлат поликлиникаларида пулли хизматлар расман жорий этилиши кутилмоқда. Депутатлар тиббий хизматларга оид қонун лойиҳасини учинчи ўқишда қабул қилди ва Сенатга юборди. Қонун кучга кирса, беморлар айрим тиббий хизматлар учун тўлов қилишига тўғри келади. Хўш, айнан қайси хизматлар пуллик бўлади ва бу беморлар учун нимани англатади?

Нималар ўзгаради?

Олий Мажлис томонидан қабул қилинган қонун лойиҳаси қуйидаги муҳимўзгаришларни назарда тутади:
Поликлиникаларда тўғридан-тўғри мурожаат қилган беморларга пуллик хизматлар кўрсатилади. Бунга қадар, беморлар оилавий шифокор ёки тиббиёт бригадаси йўлланмасибилан поликлиникага мурожаат қилганида, давлат томонидан кафолатланган бепул хизматлардан фойдаланиши мумкин эди. Янги қонун билан эса, агар фуқаро йўлланмасиз тўғридан-тўғри поликлиникага мурожаат қилса, унга хизмат пуллик асосда кўрсатилади.

Бу бепул хизматлар рўйхатидан ташқари тиббий ёрдамлар учун амал қилади

Бунда бепул хизматлар рўйхатидан ташқари тиббий ёрдамлар пуллик бўлади. Давлат аҳолига кафолатланган тиббий хизматлар ҳажмини сақлабқолади, яъни муайян хизматлар бепул бўлиб қолади. Бироқ, агар бемор қўшимча ёки стандартдан юқори хизмат сўраса (масалан, навбатсиз хизмат ёки қўшимча лаборатория таҳлиллари), бунинг учун пул тўлашига тўғри келади.

Бундан ташқари, тиббиёт ходимларини давлат рўйхатидан ўтказиш тизими жорий этилади. Шифокорлар ва фармацевтика ходимлари малака даражасини тасдиқлаш учун давлат рўйхатидан ўтиши керак бўлади.

Ҳақиқатан ҳам бепул хизматлар сақланиб қоладими?

Ҳозирча соғлиқни сақлаш тизимида кафолатланган бепул хизматлар рўйхати ўзгаришсиз қолади. Яъни:
• Оилавий шифокор кўригига бориш
• Давлат томонидан белгиланган муайян таҳлиллар
• Тез ёрдам чақириш
• Фавқулодда тиббий хизматлар
Бироқ фуқаролар кўп ҳолларда қўшимча текширувлар ва хизматлар учунтўлов қилишга мажбур бўлиши мумкин. Мисол учун, оддий қон таҳлили бепул бўлса ҳам, батафсил биокимёвий таҳлиллар ёки рентген текширувлари пуллик бўлиши мумкин.

Изоҳ

Бу қонун бепул тиббий хизматларни бекор қилмайди, лекин поликлиникалар томонидан кўрсатилаётган қўшимча хизматларни пуллик шаклда таклиф қилишга рухсат беради. Шунингдек, йўлланмасиз мурожаат қилган беморлар ҳам давлат муассасаларида тўлов асосида хизмат олишига тўғри келади.